Unser Mitglied Mundartdichter Erich Hübel schreibt seit Monaten regelmäßig neue Gedichte:
Erich Hübel
Rückblick auf ein Coronajahr
A ganses Johr ärgern mier uns edsd scho midd dem Sch… Corona rum – odder vill mehr ärgerd des uns, und mier kommer ihm nedd aus.
Alle hammer vill glernd in der Dseid, ob mer wolln hamm odder nedd:
Freyer sinn si die Leid midd Onschdand begechned – die massdn jednfalls -, heid midd Abschdand.
Freyer hodd mer si dsur Begrüßung die Hend gschüddld, heid gehd mer midd geballder Fausd affanander los – und mahnd es Gleiche.
Freyer hamm vill Leid nix beim „Amazon“ bschdelln wolln, wall der ja nedd amohl Schdeuern dsohld und seine Leid ausbeudn duhd –
heid freid mer si, dass der suh schnell lieferd.
Freyer hamm Kinder nooch ann „Leckerli“ gfroochd, heid mecherdn’s lieber a boor „Lockerli“.
Freyer is‘ mier rechd guhd ganger, und i wor midd mein Lehm dsufriedn, heid duh i mi ofd gscheid selber bedauern –
obber i wass hald scho ah: die Kinder und die Dieneydscher leidn no vill mehr in der Bandemie als iech Rendner!
- März 2021
Nostalgischer Rückblick – auf gute Zeiten?
Middlerweiln hänger mier scho arch lang in dem Loggdaun-Gschmarri fesd und kenner draußn bragdisch fasd bloß no Schbadsiern gehn.
Außer die Gschäfde fier wos dsum Essn is ja alles dsu.
Wissder’s no, wey schee des im ledsdn Summer wor? Do is mer si doch suh richdich frei vuurkommer.
Mer hodd schobbn derfn, wenn ah bloß allaans,
Mer hodd in a Werdshaus gehn kenner, einfach asuh, wemmer a Masgn affgsedsd, si die Hend desinfidsierd
und ann Dseddl midd sein Noomer ausgfülld hodd.
Heid wass mer, dass die massdn vo die Dseddl glei wechgschmissn worn sinn, wall ka Mensch kondrolliern gwolld odder kennd hodd,
wos do draff schdehd.
Und wey hammer glachd, wenn ab und dsu doch amohl a Werd hiegschaud, und dann soford die Bollidsei ongrufen hodd,
wall in sein Biergardn der Al Capone, der Osama Bin Laden der Hitler, odder die Bandsergnagger gsessn sinn.
2.Januar 2021
Selbstverpflichtung
Die, die domohls es Grundgeseds gschriem hamm, hamm gwolld, dass Abgeordnede im Bundesdooch
bloß ihrm Gewissn underworfn sei solln.
Mer is hald domohls dervo ausganger, dass Abgeordnede ah a Gewissn hamm!
Ob des heiddsudooch bei alle ah no so is, muss mer scho echd bedsweifln.
- März 2021
Es hamm si widder amohl unsere Corona-Obern dsammdelefonierd, damidd‘s neie Einschrängungen verkündn könner.
Und desderwegn gild ab nägsde Wochn: Alle Gschäfde bleim dsu, ah die fier Lebensmiddl.
Mier hamm no dswa Dooch Dseid wos dsum Essn eidsukaafn, am besdn wos, wos mer kald essn konn.
Ab dann gibd‘s a dodahle Ausgangsschberre: Ka Mensch derf mehr naus!